Abante Tonite Interactive

NLEX INIWAN NG BOLTS

By
Nawala ang bola kay Alex Stepheson (33) ng Meralco nang mula sa likod ay matapikan ni Kevin Alas (6) ng NLEX habang binubulabog ni Bradwyn Guinto (7). Kumaripas sa fourth quarter ang Bolts para ibaon ang Road Warriors, 91-84. (Patrick Adalin)
8

Kumaripas sa fourth quarter ang Meralco para iwan at tuluyang­ ibaon ang NLEX, 91-84, sa PBA Commissioner’s Cup sa Smart ­Araneta coliseum kagabi.

Kinuryente ng Bolts ang pangalawang panalo sa gayunding dami ng laro, nabaon naman sa 0-2 ang Road Warriors.

Kuntento si Meralco coach Norman Black sa depensa ng kanyang team kahit medyo relaxed pa sa first half, pati sa galaw ng ­import niyang si Alex Stepheson na nagbaba ng 24 rebounds panahog sa nilistang 18 points at three blocks.

“Second straight game we held a team below 86 points. Another good game for us,” suma ni Black. “Alex was moving a little bit better tonight. He controlled the defensive rebounds. The locals stepped up, they seem excited about our chances this conference.”

Sa bukana ng fourth quarter ay nagpakawala ng 19-4 run ang Meralco para pabukahin ang manipis na 69-67 lead sa pagsasara ng third quarter tungo sa 88-71, 5 ½ minutes sa laro. Mula roon ay hindi na naka-recover ang NLEX.

Tumapos si Jared Dillinger ng game-high 21 points para sa Bolts, may 15 si Chris Newsome, 13 kay Reynel Hugnatan at 12 si Baser Amer.

Lumamang ng hanggang 54-44 ang NLEX sa 3 ni Juami Tiongson 9:33 sa third.

Sa first game, magandang 42nd birthday gift ang tinanggap ni coach Caloy Garcia nang kumpletuhin ng kanyang Rain or Shine ang 99-95 overtime win laban sa Mahindra.

Kinubra rin ng defending champion Elasto Painters ang 2-0 card pero nangailangan pa ng extra five bago naipagpag ang makulit na Floodbuster (0-2). Kumayod ng double-double sina Shawn Taggart (29 points, 10 rebounds) at Beau Belga (12 at 10) para sa RoS.