Magsisimula pa lamang sa isang linggo ang promosyon para sa labanang Oscar De La Hoya at Manny Pacquiao na magaganap sa Disyembre 6 sa MGM Grand sa Las Vegas, pero ngayon pa lamang ay tambak na ang mga nag-aabang at naghahanap ng mabibilhan ng tiket para sa naturang sagupaan.
Ito ay kabila ng magkakaibang opinion ng mga tao hinggil sa laban, na may nagsasabing ‘mismatch’, may nagsasabing dehado si Pacquiao, mayroon ding naniniwalang hindi mananalo si De La Hoya, at may ibang naniniwala na isa lamang palabas ang magaganap na laban.
Sa Linggo (Setyembre 14) ay lilipad na si Pacquiao patungong Amerika, upang tumulong sa promotional tour ng 12-round encounter. Tutungo si Pacquiao at maging si De La Hoya sa iba’t ibang estado ng Amerika para mag-ingay ng kanilang bakbakan.
Maging ang kampo ni Pacquiao ay kinakalampag na ng mga kakilala hinggil sa tiket.
Ito ang itinuturing na pinakamalaking laban ni Pacquiao, dahil ang kikitain umanong aabot sa mahigit US$15M ay katumbas ng tatlong laban na niya.
Huling sumabak si Pacquiao at tinanghal na World Boxing Council (WBC) lightweight champion noong Hunyo, matapos niyang patulugin si David Diaz sa ika-9 na round, bagamat iyon ang unang sabak ng Filipino ring icon sa 135-lbs division.
At muli siyang aakyat ng timbang, sa pagkakataong ito’y sa 147-lbs na limit para tapatan si De La Hoya.
Gayunpaman, hindi pa mabibili ang tiket para sa sagupaang De La Hoya-Pacquiao, dahil mayroon pang ibang malalaking sagupaan na magaganap bago ang Disyembre 6, at ang mga labang iyon muna ang kinakailangang maibenta.