Kulungan ang kinasadlakan ng dalawang kalalakihang tinedyer na nanloob sa puwesto ng cellphone stall ng isang magkakamag-anak sa San Juan City.
Ang mga suspek na naaresto ng pinagsanib na puwersa ng mga tanod ng Barangay West Crame at San Juan City Police ay itinago sa mga pangalang Ian, 18, at Arjay, 17, kapwa taga-Road 7 1st West Crame, San Juan City.
Kinilala ang magkakaanak na nilooban na sina Ednemay Tabuada, 23; Liezel Aguila, 28; Aileen Atordido, John Atordido at Arlene Villanueva, mga residente ng 19D Road 11 1st St., West Crame, San Juan City.
Mahigit sa sampung cellphone, 2 bag, cash na mahigit sa P30,000 at iba pang mahahalagang bagay ang tinangay ng mga suspek.
Ayon naman sa pulisya, naging matapang pa umano ang magulang ng mga suspek at iginiit na hindi adik ang kanilang anak at huwag daw kaming basta mag-aakusa.
Samantala, umamin ang isa sa mga suspek na kamakalawa, May 6 ay birthday nito kung saan, ang perang kanilang natangay ay hindi na nabawi pa na pinaniniwalaang nagastos sa naturang selebrasyon.
|
