Dalawang major international events sa tag-araw ang nakatakdang talakayin bukas sa sesyon ng Philippine Sportswriters Association Forum sa Shakey’s U.N. Avenue branch sa Ermita, Maynila.
Dadalaw sina Harbour Centre owner Mikee Romero, team manager Eric Arejola at coach Jorge Gallent sa public sports program, na mapapakinggan ng live sa DZSR Sports Radio 918 AM band simula alas-10:30 ng umaga, upang pag-usapan ang kanilang title retention bid sa South East Asian Basketball Association (SEABA) Club Championship sa Jakarta, Indonesia na magsisimula sa Abril 3.
Makakasama rin nila sina reigning World Boxing Organization (WBO) bantamweight champion Gerry Peñalosa, Cebu-based promoter Sammy Gello-ani at promising Pinoy boxer Ciso Morales upang pangunahan naman ang nakatakdang title defense ni Peñalosa sa Abril 6 kontra Sor Vorapin ng Thailand sa Big Dome.
May iba pang mga dadalo sa forum na inisponsoran ng Shakey’s Pizza Parlor, Philippine Amusement and Gaming Corporation, Accel, Brickroad gym at Aspen spa.