Hindi lamang kumain ng alikabok bagkus inilampaso ni Sen. Francis “Chiz” Escudero III sa pinakahuling vice presidential survey ang dalawang kasamahan sa Mataas na Kapulungan ng Kongreso.
Matapos lumagpak sa No. 2 spot sa presidential survey laban kay Vice President Noli De Castro Jr., muling nakatikim ng malaking dagok si Sen. Loren Legarda matapos sumegunda lamang kay Escudero sa vice presidential survey.
Maging si Senate majority floor leader Francis Pangilinan, pumangatlo lamang sa vice presidential survey.
Kung ngayon isinagawa ang botohan sa vice president, alinsunod sa Pulse Asia survey na may petsang Pebrero 21 hanggang Marso 8, runaway winner si Escudero laban kina Legarda at Pangilinan.
Sa sampung personalidad na ikinunsiderang vice presidentiables ng 1,200 respondents, nakuha ni Escudero ang kabuuang 27%, kasunod si Legarda na nagkasya lamang sa 19% at 15% naman ang kay Pangilinan kabuntot si Senate Pro-Tempore Jinggoy Estrada na nakakuha ng 10%.
Habang ang misis ni dating senador Ralph Recto na si Batangas Governor Vilma Santos, nakakuha lamang ng 8% at pumuwesto sa No. 5 spot.
Kabilang pa sa ikinunsiderang vice presidentiables ng Pulse Asia, sina Sen. Bong Revilla Jr., nakakuha ng 5%, Makati Mayor Jejomar Binay, 3%, dating senador Sergio Osmeña III, 3%, Sen. Richard Gordon, 2% at Juan Miguel “Migz” Zubiri, 2%.
|
