Pinagtawanan lamang ng oposisyon ang maagang anunsiyo ni administration Sen. Miriam Defensor-Santiago na tatakbo ito sa 2010 national election upang ‘i-terrorize’ ang kanyang mga kalaban sa pulitika.
Hindi maitago ni opposition Sen. Panfilo ‘Ping’ Lacson ang matawa sa deklarasyong ito ni San­tia­go sa harap ng Philippine media na nag-cover sa US trip ni Pangulong Gloria Macapagal-Arroyo.
Mula New York, idineklara ni Santiago ang pagtakbong Presidente sa 2010 national election kapag nabigong masungkit ang isang silya sa International Court of Justice (ICJ), kasabay ang bantang wawasakin nito ang kanyang mga kalaban.
“If I don’t make it, then I’ll probably run for president of the Philippines. That is just to put terror in the heart of my enemies. But I do know that my enemies will heave a collective sigh relief. That’s my only regret,” pananakot ni Santiago.
Ayon kay Lacson, isa sa presidential aspirant sa 2010 national election, kung masasagot ni Santiago ang naunang deklarasyong ‘tatalon sa eroplano’, ito’y maaari na niyang paniwalaan.
“Tatalon din kaya sa eroplano. Tapos sasabihin, ‘I lied’,” kantiyaw ni Lacson kay Santiago tungkol sa naunang deklarasyon ng lady solon na tatalon sa eroplano kapag inaresto si dating Pangulong Joseph “Erap” Estrada.
Maliban dito, idineklara ni Santiago ang pagbibitiw bilang senador kapag naupong miyembro ng ICJ at maagang hinihingi ang kapatawaran sa mga nagtiwala sa kanya noong 2004 national election.