Pinaplano nang i-take over ng gobyerno ang compulsory third party liability (CTPL) insurance para sa motor vehicles sa kabila ng matinding pagtutol ng may 60,000 insurance agents na napipintong mawalan ng trabaho.
Ayon sa mga sources sa Department of Transportation and Communication (DOTC), nakipagkita na kamakailan si DOTC Secretary Leandro Mendoza sa mga top officials ng Government Service Insurance System (GSIS), Insurance Commission, at Stradcom Corporation para lagdaan ang memorandum of agreement na maglalagay sa CTPL insurance ng may 5.5 million motor vehicles sa bansa sa ilalim ng kontrol ng GSIS.
Hindi naman nakunan ng reaksyon si Mendoza subalit isang kopya ng memorandum of agreement ang natanggap ng isang publikasyon kung saan nilagdaan umano ng assistant secretary ng kalihim na si Land Transportation Office chief Albert Suansing, at mga partner nitong sina GSIS General Manager Winston Garcia; Insurance Commissioner Eduardo Malinis at Stradcom President Cezar Quiambao.
Sa ilalim ng kasunduan, ipapatupad na ng DOTC ang kontrobersyal na Order 2007-28 na inisyu noong July 5 ng nakaraang taon kung saan isinama na ang CTPL sa bawat pagpaparehistro ng sasakyan sa LTO.
Ang naturang kautusan ay umani ng pagbatikos mula sa iba’t ibang grupo na apektado rito ang may 90 insurance companies sa bansa bagama’t ayon sa DOTC, layunin nito na masugpo ang malawakang pagbebenta ng pekeng CTPL certificates of cover.
Kaugnay nito, isang rally ang isinagawa kahapon sa harap ng DOTC office sa Mandaluyong, ng Bukluran ng mga Manggagawa sa Industriya ng Seguro (BMIS), na binubuo ng 60,000 agents na nagbebenta ng CTPL.
“Giyera na ‘to (This is war),” ani BMIS President Salvador Navidad. “Pupunitin namin ang aming mga lisensya para ipakita sa DOTC at Insurance Commission ang aming galit sa pag-agaw nila sa aming hanapbuhay.”
Magsasampa rin ng kaso sa korte ang BMIS para kuwestyunin ang legalidad ng naturang hakbang ng DOTC.