BEIJING - - Iaasa na lamang ni RP bet Marestella Torres sa suwerte ang kanyang magiging kampanya ngayon sa women’s long jump event ng 29th Olympic Games track and field competitions sa Bird’s Nest.
Kahit pa hindi na inaasahang makakapasok si Torres sa Top 12 finals entries, susubukan pa rin ng 27-anyos na si Torres na lagpasan ang kanyang personal high na 6.63 meters, nakuha niya sa Asian championship noong 2005 sa Incheon, South Korea, sa kanyang paglundag kontra 19 na iba pa sa Group B.
“Mahirap sir, pero laban lang tayo. Malay mo baka mag-qualify,” ani Torres, two-time gold medallist sa Southeast Asian Games at may gold at bronze medal sa dalawang legs ng Asian Grand Prix series.
Sasalang siya sa alas-10:00 ng umaga at makakatapat sa kabuuang 41-women field ang mga pinapaborang sina defending champion Tatiana Levedeva ng Russia, may 7.07 meters jump sa Athens Olympics at may personal best na 7.33 meters, Russian Tatyana Kotova (7.42 meters) at si Naide Gomex ng Portugal (7.12 meters).
Si Torres ang isa sa dalawang Filipino bets sa athletics bilang mandatory competitors. Ang isa pa rito ay si Henry Dagmil, na nagtapos sa ika-34t posisyon sa 38 starters sa men’s event noong Sabado.