Dahil sa pamamaga ng kanyang kanang kamay hindi na makakasalang si reigning World Boxing Organization (WBO) bantamweight champion Gerry Peñalosa sa undercard ng Shane Mosley-Zab Judah slugfest sa Mayo 31 sa Mandalay Bay sa Las Vegas, Nevada.

Sa payo na rin ni Dr. Butch Penamante, ang family physician ng Peña­losa, kinakailangan ng two-time world champion na ipahinga muna ang kamay na napinsala sa kanyang pagte-training noon sa laban nila ni Thai Ratanachai Sor Vorapin, na kanyang tinalo kamakailan para sa matagumpay na title defense.

Nasaktan ang kamay ng 35-anyos na kampeon sa sparring session niya kay dating world champion Kevin Kelly sa kanyang training sa Las Vegas isang buwan na ang naka­karaan ngunit sinabi ni Peñalosa na hindi pa niya nasasabi ang kanyang desisyon sa kanyang Ame­rican manager na si Billy Keane.

“Hindi ko pa na-inform `yung American manager ko tungkol sa desisyon ko. Pero sa advice nga ng doctor ko i-pahi­nga ko raw muna ‘yung kamay ko kasi medyo maga pa hanggang nga­yon,” paglalahad ni Peñalosa kahapon sa sesyon ng SCOOP session sa Kamayan-Padre Faura.

Wala pang nababanggit na makakalaban ni Peñalosa sa May 31 bo­xing card, kung sakali mang tumango siya rito.

Sinabi rin ni Peñalosa na magiging maganda ang pahinga niya bilang paghahanda sa posibleng rematch niya kay WBO super-bantamweight champ Daniel Ponce de Leon sa Agosto.

“Mas magandang nakapahinga para maganda ang kundisyon natin against Ponce de Leon,” aniya.