GANDANG-GANDA kami sa pictorial ni Sarah Geronimo para sa HerBench. Hindi namin siya nakilala sa malalaking HerBench billboards niya dahil iba ang itsura niya at dalagang-dalaga ang dating niya.
Ni-launch na formally si Sarah bilang latest celebrity endorser ng HerBench nu’ng Martes sa SM Mall of Asia.
Nilagyan ng stage na may rampa sa gitna ng skating rink at nagkaroon ng mini-fashion show. Habang kumakanta sa stage si Sarah ay may mga little girls na nag-a-ice skating at sumasayaw-sayaw sa yelo.
After ng autograph signing ay umalis agad ang Pop Princess kaya ang Bench big boss na si Mr. Ben Chan na lang ang tsinika-tsika namin.
“Kinuha namin si Sarah dahil unang-una, she’s very talented, very good singer, very good actress at very good host pa.
“Pag naghu-host siya, she’s very candid, hindi scripted. Mahusay talaga, pati sa pag-arte. So, I think we’re very lucky na she finally signed up with us,” nakangiting sey ng Bench mogul.
Factor din ba ‘yung pagiging sikat ni Sarah at pagkakaroon ng maraming fans?
“Oo, big factor talaga ‘yon. Kasi, from A to B, all-classes, hawak niya. Nakita mo nga, pati ‘yung may-ari ng SM, nandito kanina para panoorin siya!”
Ilang years ang kontrata ni Sarah sa HerBench?
“Hanggang gusto niya siguro! Ha! Ha! Ha!” tawa ni Sir Ben.
Makakasama ni Sarah sa HerBench Teens sina Shaina Magdayao at Kim Chiu.
Sina Angelica Panganiban, Alessandra de Rossi, Rufa Mae Quinto, Francine Prieto at Priscilla Meirelles ay sa underwear. Nasa HerBench din sina Lucy Torres at Kris Aquino, at sa Bench Fix Salon si Iya Villania.
***
Naitanong din namin kay Sir Ben ang dahilan sa biglaang pagtanggal sa ilang sexy Bench Body billboards ni Dingdong Dantes.
“Hindi naman, madalas kasi kaming nagpapalit, ‘di ba? Like ngayon, turn na ni Sarah, so ‘yung ibang billboards, pinalitan na ni Sarah. After a while, school opening na, so ‘yung back to school campaign naman namin,” paliwanag niya.
Eh, bakit ‘yung billboard ni Dingdong sa Quirino Avenue, tinanggal kaagad kahit sandali pa lang itong inilalagay roon?
“Kasi, katulad nu’ng kay Sarah, kung saan-saan nakalagay ‘yung billboard niya. Some will stay for a month, some will stay for two weeks. Depende. Kasi, we need it already, eh!”
So, hindi ‘yun dahil sa mga moralista na inirereklamo ang umano’y ‘malalaswang’ billboard ni Dingdong?
“Ah, hindi! Bakit ‘yung iba, hindi tinanggal? Hindi naman gano’n, walang gano’n. At saka approved by the AdBoard ‘yan, eh! So, lahat may approval bago namin gamitin, either by print or billboard. Aprubado ‘yan ng AdBoard, so everything is polished, ‘ika nga, bago namin ilabas.”
At saka never naman naging malaswa ang Bench, ‘di ba?
“Never!” mabilis na sagot ng Bench owner.
May petsa na ang malaking fashion show ng Bench sa taong ito. Sa Hulyo 25 ito gaganapin sa Araneta Coliseum (pero wala pang final title).
Ayon sa Bench ay maraming sorpresang dapat abangan sa nasabing underwear and denim show, kung saan makakasama na ang bagong dagdag sa Bench family na sina Dingdong at Sarah.
