Bawal angkas-bata, matagal nang batas

By

Ipinatupad na kahapon ang batas na nagbabawal sa mga motorcycle rider na bumiyahe sa mga pampublikong kalsada habang may angkas na bata.

Sakop ng Republic Act 1066 or ang Children’s Safety on Motorcycles Act of 2015 ang lahat ng pampublikong kalsada sa buong bansa tulad ng national highways, provincial roads, municipal at barangay streets.

Sa aking interview sa ating radio program kay LTO Chief Edgar Galvante, sinabi niyang papayagan lamang na mag-angkas ng bata kung kaya na nitong maabot ang foot pegs o tapakan ng motorsiklo, may suot na tamang standard protective helmet o gear; at buong kayang makayakap sa baywang ng motorcycle rider.

Paalala rin ni Galvante na bawal ang mag-angkas ng mga bata sa harapan ng rider.

Pero sakaling may emergency, papayagan din ang mga bata na maiangkas sa motorsiklo upang mabigyan ng dagliang atensiyong medikal.

Ang pangunahing tatayong implementing agency ng nasabing batas. Ang LTO rin ang may awtoridad na mag-deputize ng mga miyembro ng Philippine National Police (PNP), Highway Patrol Group (HPG), LTFRB, Metropolitan Manila Development Authority (MMDA) at local government units upang tiyakin   naipapatupad ang batas.

Ang mga mahuhuling lalabag sa batas ay mumultahan ng P3,000 at P5,000 sa una at ikalawang pagkakataon; P10,000 sa ikatlong beses ng pag­labag sa batas at isang buwang suspensiyon ng lisensiya ng rider.

Ang lalabag sa higit­ pa sa tatlong beses ay papatawan ng awtomatikong pagbawi ng kanyang lisensiya. Walang sisinuhin, sibilyan man o unipormadong personnel.

Pinabulaanan ni Galvante na anti-poor ang batas na ito, sa halip ay ang kapakanan at kaligtasan ng mga bata at bawat miyembro ng pamilya ang kanilang isinasaalang-­alang.

Sa dami nang nakikita nating lumalabag sa batas na ito, kulang na kulang ang mga tauhan ng LTO, HPG at MMDA para magpatupad nito. Dapat ay dagdagan pa ang i-de­putized ng LTO na law enforcement group para mas maging epektibo ang implementasyon nito.

Hinihikayat din ni Galvante ang publiko na maging aktibo rin sa pagsusumbong sa kanila ng mga violators. Video-han o picturan daw ninyo kung may mapansin kayong lumalabag sa batas na ito.

Palagay ko ay dapat ding bantayan ang law enforcers na manghuhuli sa mga lumalabag sa batas para maiwasan na magamit ito sa kurapsyon ng pango­ngotong.

Baka dahil sa mataas na multang 3 libong piso para sa first offense ay umiral ang suhulan sa pagitan ng violators at nanghuhuli at pumayag na lamang sa aregluhan?

Subalit alam ba ninyong matagal na itong batas pero hindi lamang epek­tibong naipapatupad? Taong 2015 pa nang lagdaan ni dating Pangulong Benigno Aquino III ang batas.

Harinawa ay hindi maging ‘ningas-kogon’ ang pagpapatupad ng batas na ito. Sa dami ng mga aksidente sa lansangan na kinasasangkutan ng motorcycle rider, napapanahon at dapat lamang na higpitan talaga na huwag nang idamay pa ang mga batang paslit.